މަޖިލިސް ކުރިގޭގެ ތާރީޚް

ހަކުރާ ގަނޑުވަރު

ދާރުލްޢުލޫމް

”އިބްރާހީމިއްޔާ” އަށް ފަހު މަޖިލީހުގެ ޖަލްސާތައް ބޭއްވިފައިވަނީ، ދާރުލްޢުލޫމްގައިއެވެ. ދާރުލްޢުލޫމަކީ މަޙްކަމަތުލްއަޝްޣާލުން އިމާރާތްކުރެއްވި ބިނާއެކެވެ. އެތަން ހަދާ ނިމުނީ 1952 ވަނަ އަހަރުގެ ނިޔަލަށެވެ. އެ އިމާރާތް ބިނާކޮށްފައިވާ ބިމަކީ، ކުޑަރަންނަބަނޑޭރި ކިލޭގެފާނު އަމިއްލަފުޅު ބިމާއި އަތިރީގެ އަލީ އަޙުމަދު ދޮށިމޭނާ ކިލޭގެފާނު ބިމާއި އަދިވެސް ބައެއް ފަރާތްތަކުގެ އަމިއްލަ ބިން އެކުލެވިފައިވާ ސަރަޙައްދެކެވެ. ފުރަތަމަ ޖުމްހޫރިއްޔާ 1953 ގައި އިޢުލާނު ކުރެއްވީ ދާރުލްޢުލޫމްގައެވެ. އަދި އެކަމުގެ ހުރިހާ ރަސްމިއްޔާތުތަކެއްހެން ބޭއްވީވެސް އެތަނުގައެވެ.

ބޮޑުއިސްޓޯރުގެ އިރުންހުރި އިމާރާތް

” ދާރުލްޢުލޫމް” އަށް ފަހު މަޖިލީހުގެ ޖަލްސާތައް ބޭއްވިފައިވަނީ، ބޮޑު އިސްޓޯރުގެ އިރުމަތީ ބައިގައެވެ. ބޮޑު އިސްޓޯރުގެ އިރުމަތީ ބަޔަކީ އިސްޓޯރާއި އިންވެގެން އިރަށް ގޯޅީގެ އިރުމަތީ ފަރާތުން ހެދި ވަކި އިމާރާތެކެވެ. މި އިމާރާތުގައި އެންމެ ކުރިން ކޮށްފައިވާ ކަމަކަށް ފާހަގަ ކުރެވެނީ ޙަސަން  ނޫރައްދީނުއައްސާނީގެ ރަސްކަމަށް ކޮލިލީ ދުވަހު ދިވެހި ރައްޔިތުންގެ ވާރު ކަނޑުއްވާލެއްވުމާ ގުޅިގެން ސަރުކާރުގެ އާމްދަނީ ހިފެހެއްޓުމަށްޓަކައި ނަންގަވަން ފެއްޓެވި އާއިދާ ނަންގަވަން ފެއްޓެވުމެވެ. އެ އިމާރާތްވެސް ބިނާކޮށްފައިވަނީ ވުޒާރަތުލް އަޝްޣާލުގެ ބެއްލެވުމުގެ ދަށުންނެވެ. އެއީ ފުރަތަމަ ޖުމްހޫރިއްޔާއަށް މާލޭގެ މޫނުމަތި ވަކިން ޚާއްޞަކޮށް މާލޭގެ ބަނދަރުމަތި ފުރިހަމަކުރުމުގެ ގޮތުން ކުރި މަސައްކަތްތަކުގެ ތެރެއިން މަސައްކަތެކެވެ.

ނާދީތަމައްދުން

ބޮޑު އިސްޓޯރުގެ އިރުމަތީ އިމާރާތަށްފަހު ރައްޔިތުންގެ މަޖިލީހުގެ ޖަލްސާތައް ބޭއްވިފައިވަނީ، ނާދީތަމައްދުންގައެވެ. އަލްފާޟިލް އިބްރާހިމް ނާޞިރުގެ ވެރިކަމުގެ ފަހު ދުވަސްވަރާއި، ރައީސުލް ޖުމްހޫރިއްޔާ އަލްއުސްތާޛު މައުމޫންޢަބަދުލް ޤައްޔޫމްގެ ރިޔާސަތުގެ ގާތްގަޑަކަށް ވިއްސަކަށް އަހަރު ރައްޔިތުންގެ މަޖިލީހުގެ ޖަލްސާތައް ބޭއްވިފައިވަނީ ނާދީތަމައްދުންގެ އިމާރާތުގައެވެ. އެ އިމާރާތުގައި ލަކުޑި އިސްޓޯރެއް ހިންގާފައި، އޭގެފަހުން އެ އިމާރާތުގައި އެއްވެސް ކަމެއްނުކޮށް ދުވަސްތަކެއް ވޭތުވުމަށްފަހު، ނާދީ ބަދަލުވެގެން ދިޔައީ ދިވެހިރާއްޖޭގެ ރައްޔިތުންގެ މަޖިލިސްކުރާ އިމާރާތަށެވެ. ނާދީގައި ރައްޔިތުންގެ މަޖިލިސްކުރަން ފެށުމާއެކު ތަރައްޤީގެ ރޮނގުގައި ވަރަށް މުހިއްމު އާފިޔަވަޅެއް އެޅުނެވެ. އެއީ ނާދީގައި ”ޤައުމީ ކުތުބުޚާނާ” ގެ ނަމުގައި ކުތުބުޚާނާއެއް އުފެއްދުމެވެ. މިހާރު ހިނގަމުންދާ، ”ޤައުމީ ކުތުބުޚާނާ” ގެ ފެށުމަކީ ނަދީގައި ފެއްޓެވި ކުތުބުޚާނާއެވެ. މިއަދާ ހަމައަށް ނާދީއަކީ ހަމަޖކުރީއްސުރެ ހުރި އިމާރާތްނަމަވެސް އެ އިމާރާތަށް ބައެއް ބަދަލު ގެނެވިފައިވެއެވެ. ރައްޔިތުންގެ މަޖިލީހުގެ މަސައްކަތް ދުވަހުން ދުވަހަށް އިތުރުވެ ދާއިރާ ފުޅާވުމާގުޅިގެން އިމާރާތުގެ ދަތިކަން އިޙްސާސްކުރެވޭތީ ނާދީގެ ހުޅަނގުން އާ އިމާރާތެއް ހެއްދެވުމުގެ ޚިޔާލުކުރެވިގެން 2 ބުރި އިމާރާތެއް ތައްޔާރުކޮށްފައިވެއެވެ.