ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 15 ވަނަ ޖަލްސާގައި، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ޑިރެކްޓަރުންގެ ބޯޑުގެ މެންބަރުންގެ ތެރެއިން މެންބަރަކު އިސްތިޢުފާދެއްވުމާ ގުޅިގެން އެބޯޑުން ހުސްވެފައިވާ މެންބަރުކަމަށް އަލްފާޟިލް އަޙްމަދު ފާއިޒް މުޙައްމަދު / އަސްރަފީހިޔާ، ލ.މާވަށް ޢައްޔަންކުރެއްވުމަށް މަޖިލީހުން ފާސްކުރައްވައިފިއެވެ.
މިގޮތަށް ފާސްކުރެއްވީ އެވަގުތު ޖަލްސާއަށް ޙާޒިރުވެ ވޯޓުގައި ބައިވެރިވެވަޑައިގެންނެވި މެންބަރުންގެ ތެރެއިން 55 މެންބަރުންގެ ޢިއްތިފާގުންނެވެ.
ޤާނޫނު ނަންބަރު 2010/3 (ޓެކްސް ނެގުމާބެހޭ އިދާރީ ޤާނޫނު) ގެ 4 ވަނަ މާއްދާގެ (ބ) ގައިވާ ގޮތުގެމަތިން ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކުރެއްވުމަށް ރައްޔިތުންގެ މަޖިލީހުން އިޤްތިޞާދީ ކޮމިޓީއަށް ފޮނުއްވާފައިވާ މައްސަލައިގެ ރިޕޯޓް މިއަދުގެ ޖަލްސާގައި ހުށަހަޅުއްވާދެއްވާފައިވަނީ އެކޮމިޓީގެ މުޤައްރިރު ހިތަދޫ އުތުރު ދާއިރާގެ މެންބަރު މުޙަންމަދު އަސްލަމްއެވެ.
މިއަދުގެ ޖަލްސާގައި މިރިޕޯޓަށް 4 މެންބަރުން ވާހަކަދައްކަވާފައިވެއެވެ.