އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލު މަޖިލީހުން ބަލައިގަތުމަށް ފާސްވެ، ޤައުމީ ސަލާމަމަތުގެ ކޮމިޓީއަށް ދިރާސާ ކުރެއްވުމަށް ފޮނުއްވައިފި

މިއަދު އޮތް ރައްޔިތުންގެ މަޖިލީހުގެ މިދައުރުގެ 10 ވަނަ ޖަލްސާގައި، ޤާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) އަށް އިޞްލާޙު ގެނައުމުގެ ބިލު މަޖިލީހުގެ ގަވައިދުގައިވާ ގޮތުގެ މަތިން ޤަޢުމީ ސަލާމަތުގެ ކޮމިޓީއަށް ދިރާސާ ކުރެއްވުމަށް ފޮނުއްވައިފިއެވެ.

މިއަދުގެ ޖަލްސާގައި މިބިލުގެ އިބްތިދާޢީ ބަހުސް މިއަދު ނިމުމާއެކު އެބިލު މަޖިލީހުން ބަލައިގަތުމަށް ފެނޭތޯ މަޖިލީހުގެ ގަވައިދުގެ 77 ވަނަ މާއްދާގެ (ނ) ގެ ދަށުން މިއަދުގެ ޖަލްސާގައި ވޯޓަށް އެއްސެވުމުން، އެ ބިލު މަޖިލީހުން ބަލައިގަތުމަށް ފާސްވީ 34 މެންބަރުންގެ އިއްތިފާޤުންނެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލަކީ ރައްޔިތުންގެ މަޖިލީހުގެ 2011 ވަނަ އަހަރުގެ 3 ވަނަ ދައުރުގެ 1 ވަނަ ޖަލްސާގައި ފުރަތަމަ ކިއުން އިއްވައި އެއަހަރުގެ 3 ވަނަ ދައުރުގެ 8 ވަނަ ޖަލްސާގައި އިބްތިދާޢީ ބަހުސް ފެށި ބިލެކެވެ. މިއަދު ޖަލްސާގައި ބިލުގެ ބަހުސް  ނިންމަވާލެއްވިއިރު ޖުމްލަ 31 މެންބަރުން ވާހަކަފުޅު ދައްކަވާފައިވެއެވެ.

ހިތަދޫ ދެކުނު ދާއިރާގެ މެންބަރު ޙަސަން ލަޠީފް މިބިލު ހުށަހަޅުއްވާފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުނާ އެއްގޮތްވާ ގޮތުގެ މަތިން، ސިޓީ ކައުންސިލުން ދޭ ޚިދުމަތްތައް ރައްޔިތުން ގާތުން ޚިދުމަތް ދިނުމުގައި ރައްޔިތުން ބާރުވެރި ކުރުމަށްޓަކައި ބޭނުންވާ އޮނިގަޑު އިތުރަށް ހަރުދަނާ ކުރުމަށްޓަކައި އެޤާނުނަށް ގެންނަން ފެންނަ އިޞްލާޙުތައް ގެނައުމަށެވެ.