މިއަދު އޮތް ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ 9 ވަނަ ޖަލްސާގައި “ވިޔަފާރި ރަޖިސްޓްރީކުރުމުގެ ބިލު” ކޮމިޓީ މަރުޙަލާ ނިމި މަޖިލީހުން ރިޢާޔަތްކުރެއްވުމަށް ހުށަހެޅުއްވުމުން، އެ ބިލުގެ ބަޙުސް ކުރިއަށް ދަނިކޮށް މަޖިލީހުގެ ޤާނޫނީ ޢަދަދު ހަމަނުވެގެން މިއަދުގެ މަޖިލީހުގެ ޖަލްސާ މެންދުރު 13:10 ގައި ނިންމާލައްވައިފިއެވެ.
މިއަދުގެ ޖަލްސާގައި އެޖެންޑާ ކޮށްފައިވާ ނުނިމި ހުރި މަސައްކަތްތަކުގެ ތެރޭ ހިމެނޭ ހިތަދޫ ދެކުނު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) އަށް އިޞްލާޙު ގެނައުމުގެ ބިލުގެ ބަހުސްވެސް ކުރިއަށްގެންދަވާފައިވެއެވެ.
ޖަލްސާގެ ޤާނޫނީ ޢަދަދު ތަކުރާރުކޮށް ގެއްލި މެދުކަނޑާލާފައިވާއިރު، 13:00 ގައި ޖަލްސާ އަލުން ފެއްޓެވުމަށް ރަނގަބީލުޖަހާ، ޖަލްސާގެ ޤާނޫނީ ޢަދަދު ހަމަނުވުމުން މަޖިލީހުގެ ގަވައިދުގެ 37 ވަނަ މާއްދާގެ (ނ) ގައިވާ ގޮތުގެ މަތިން މިއަދުގެ ޖަލްސާ ވަނީ ނިންމަވާލައްވާފައެވެ.