ގަވާއިދު ކޮމިޓީގެ ބައްދަލުވުން މިއަދު ބާއްވައިފި

މިއަދު ހެނދުނު 11:15 ން 12:05 ށް ގަވާއިދު ކޮމިޓީގެ ބައްދަލުވުމެއް ބޭއްވުނެވެ. މި ބައްދަލުވުމުގައި، ކޮމިޓީއަށް ހުށަހެޅިފައިވާ ގަވާއިދުތައް ދިރާސާކުރެއްވުން ކުރިއަށް ގެންދެވިއެވެ. މިގޮތުން ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑަށް ޢަމަލުކުރުމުގެ ގަވާއިދާ ގުޅޭގޮތުން މެންބަރުން މަޝްވަރާކުރައްވައި، އެ ގަވާއިދު ޤާނޫނު ނަންބަރ 2008/6 (ޢާންމު ގަވާއިދުތަކާބެހޭ ޤާނޫނު) ގެ ޖަދުވަލް 1 އަށް އިތުރުކުރުމަށް ހާޒިރުވެވަޑައިގެންނެވި މެންބަރުންގެ އިއްތިފާގުން ފާސްކުރެއްވިއެވެ.

މިބައްދަލުވުމަށް ހާޒިރުވެވަޑައިގެންނެވި މެންބަރުންނަކީ ކޮމިޓީގެ މުޤައްރިރު އިހަވަންދޫ ދާއިރާގެ މެންބަރު އަޙްމަދު ޢަބްދުﷲ، ހިތަދޫ ދެކުނު ދާއިރާގެ މެންބަރު ޙަސަން ލަޠީފް، ފުވައްމުލަކު އުތުރު ދާއިރާގެ މެންބަރު މުޙަންމަދު ރަފީޤް ޙަސަން، މާފަންނު އުތުރު ދާއިރާގެ މެންބަރު އިމްތިޔާޒް ފަޙުމީ، ފަރެސްމާތޮޑާ ދާއިރާގެ މެންބަރު އިބްރާހީމް މުއްޠަލިބް، ފުވައްމުލަކު މެދު ދާއިރާގެ މެންބަރު ޝިފާޤް މުފީދު، ދާންދޫ ދާއިރާގެ މެންބަރު މުޙަންމަދު ރިޔާޟް އަދި އިސްދޫ ދާއިރާގެ މެންބަރު އަލްފާޟިލް އަޙްމަދު ރަޝީދު އިބްރާހީމް އެވެ.

ހާޒިރުވެވަޑައިނުގަންނަވާ މެންބަރުންނަކީ ނައިފަރު ދާއިރާގެ މެންބަރު އަޙްމަދު މުޙަންމަދު އަދި އޭދަފުށި ދާއިރާގެ މެންބަރު އަޙްމަދު ސަލީމް އެވެ. ދިއްދޫ ދާއިރާގެ މެންބަރު އަޙްމަދު ސަމީރު އަށް ހާޒިރުވެވަޑައިނުގެންނެވުނީ ސަލާމްގައި ހުންނެވުމުންނެވެ.

25 ޖުމާދަލްއޫލާ 1433

17 އޭޕްރިލް 2012