ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ 3 ވަނަ ބައްދަލުވުން ބާއްވާފައިވަނީ މިއަދު ހމެންދުރު 13:45 ން 13:50 އަށެވެ. މިބައްދަލުވުމުގައި ކޮމިޓީގެ 5 މެންބަރުން ބައިވެރިވެވަޑައިގަތެވެ.
މިއަދުގެ ކޮމިޓީ ބައްދަލުވުމުގައި ޑިޕާޓްމެންޓް އޮފް ޕެނިޓެންޝަރީ އެންޑް ރިހެބިލިޓޭޝަން (ޑީ. ޕީ. އާރް. އެސް ) ގައި ހުރި މައްސަލަތައް ފާހަގަކުރައްވާ މަޑުއްވަރި ދާއިރާގެ މެންބަރު ވިސާމް ޢަލީ ހުށަހަޅުއްވާފައިވާ މައްސަލައާ މެދު މަޝްވަރާ ކުރައްވާ، ޑީ. ޕީ. އާރް. އެސް ގެ އިސް ބޭފުޅުންނާއި ބައްދަލުކުރެއްވުމަށް ނިންމެވިއެވެ. މީގެ އިތުރުން ކުޑަކުދިންނަށް ޖިންސީ ގޯނާ ކުރާ މީހުންނާއި މެދު ޚާއްސަ އުސޫލުތަކަށް ޢަމަލު ކުރުމުގެ ޤާނޫނުގެ ދަށުން ހަދަން ލާޒިމް ކުރާ ޤަވާއިދުތައް އެޓާރނީ ޖެނެރަލް ނަހަދާ ހުރުމުގެ ސަބަބުން ހުށަހެޅިފައިވާ މައްސަލައާއި މެދުވެސް މަޝްވަރާ ކުރައްވާފައިވެއެވެ.
މިއަދުގެ މި ބައްދަލުވުމުގައި ބައިވެރިވެވަޑައިގެންނެވި މެންބަރުންނަކީ ހަނިމާދޫ ދާއިރާގެ މެންބަރު މުޙައްމަދު މުޖްތާޒް، ފުނަދޫ ދާއިރާގެ މެންބަރު ޢަލީ ސަލީމް، މެދުހެންވޭރު ދާއިރާގެ މެންބަރު ޢަލީ އާޒިމް، މަޑަވެލި ދާއިރާގެ މެންބަރު މުޙައްމަދު ނާޒިމް، އަދި މާފަންނު ހުޅަނގު ދާއިރާގެ މެންބަރު އަބްދުﷲ އަބްދުލްރަޙީމް އެވެ.