ރައްޔިތުންގެ މަޖިލީހުގެ ރައީސްގެ ދައުވަތަކަށް ރޭ ރާއްޖެ ވަޑައިގެންނެވި ޗައިނާގެ ޕީޕަލްސް ޕޮލިޓިކަލް ކޮންސަލްޓޭޓިވް ކޮންފަރެންސް (ސީ.ޕީ.ޕީ.ސީ.ސީ.) ގެ ވައިސް ޗެއަރމަން ޗެން ޖިއާއުގުއަންގް ރައްޔިތުންގެ މަޖިލީހުގެ ރައީސް އަލްފާޟިލް ޢަބްދުﷲ މަސީޙް މުޙައްމަދުއާ މިއަދު ބައްދަލުކުރައްވައިފިއެވެ. މިބައްދަލުކުރެއްވުން އޮތީ ރައްޔިތުންގެ މަޖިލީހުގެ ގޭގައެވެ.
މިބައްދަލުކުރެއްވުމުގައި ރައްޔިތުންގެ މަޖިލީހުގެ ރައީސް ދެއްކެވި ވާހަކަފުޅުގައި، ދިވެހިރާއްޖެއާއި ޗައިނާއާ ދެ ޤައުމު ދެމެދުގައި އޮތް ގާތް ގުޅުން ވަރަށް ބޮޑަށް ތަރައްޤީވަމުން އައިސް މިހާރު އެ ގުޅުން ވަނީ ވަރަށް މަތީ ފެންވަރަކަށް ބަދަހިވެފައިކަމުގައި ވިދާޅުވިއެވެ. މީގެ އިތުރުން ޗައިނާ ސަރުކާރުން ދިވެހިރާއްޖޭގެ އުމްރާނީ އަދި އިޤްތިޞާދީ ތަރައްޤީއަށް ވެދެއްވަމުން ގެންދަވާ ދީލަތި އެހީތެރިކަން ފާހަގަކުރައްވަމުން، ލޮބުވެތި ދިވެހި ރައްޔިތުންގެ ނަމުގައި ޗައިނާގެ ސަރުކާރަށާއި ޗައިނާގެ އެކުވެރި ރައްޔިތުންނަށް ޝުކުރު އަދާކުރެއްވިއެވެ.
ޗެން ޖިއާއުގުއަންގްގެ ވާހަކަފުޅުގައި ދިވެހިރާއްޖޭން ލިބުނު ހޫނު މަރުޙަބާއަށްޓަކައި ޝުކުރު އަދާކުރެއްވިއެވެ. އަދި މި ދަތުރުގެ ސަބަބުން ރައްޔިތުންގެ މަޖިލީހާއި ސީ.ޕީ.ޕީ.ސީ.ސީ. ދެމެދު އޮތް ގުޅުމާއި، ޗައިނާ އާއި ދިވެހިރާއްޖެއާއި ދެމެދު އޮތް ގުޅުން އިތުރަށް ބަދަހިވެގެންދާނެ ކަމުގައި ވިދާޅުވިއެވެ. މީގެ އިތުރުން ދެ ޤައުމު ގުޅިގެން ހިންގަމުންދާ އިޤްތިޞާދީ އަދި ޢުމްރާނީ ކުރިއެރުމުގެ މަޝްރޫޢުތަކަކީ ޗައިނާއާއި ދިވެހިރާއްޖޭގެ ގުޅުން ދުވަހުން ދުވަހަކަށް ވަރުގަދަވަމުންދާ ކަމުގެ ހެކި ކަމަށް އޭނާގެ ވާހަކަފުޅުގައި ފާހަގަކުރެއްވިއެވެ.
މިބައްދަލުކުރެއްވުމުގައި ރައްޔިތުންގެ މަޖިލީހުގެ މެޖޯރިޓީ ލީޑަރު ވިލިމާލެ ދާއިރާގެ ޢިއްޒަތްތެރި މެންބަރު އަޙްމަދު ނިހާން ހުސައިން މަނިކާއި މަޖިލީހުގައި ހިމެނޭ ސިޔާސީ ޕާޓީތަކުގެ ބައެއް އިއްޒަތްތެރި މެންބަރުންނާއި ރައްޔިތުންގެ މަޖިލީހުގެ އިދާރާގެ އަމީން އާންމު އަޙްމަދު މުޙައްމަދާއި، އިދާރާގެ އިސް ބައެއް ބޭފުޅުން ބައިވެރިވެވަޑައިގެންނެވިއެވެ. އަދި ޗެން ޖިއާއުގުއަންގްގެ އަރިހުގައި ޗައިނާގެ ވަފުދުގައި ހިމެނިވަޑައިގަންނަވާ ބޭފުޅުންނާއި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ފުކާންގް ބައިވެރިވެވަޑައިގެންނެވިއެވެ.
16 ޞަފަރު 1437
28 ނޮވެމްބަރ 2014