ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނަށް (ޤާނޫނު ނަންބަރު 93/4) އިޞްލާޙު ގެނައުމުގެ ބިލު، ޤައުމީ ތަރައްޤީގެ ކޮމިޓީން ދިރާސާކުރައްވައި ނިންމެވިގޮތަށް މިއަދު ބޭއްވުނު ރައްޔިތުންގެ މަޖިލީހުގެ މިދައުރުގެ 7 ވަނަ ޖަލްސާގައި ފާސްކުރައްވައިފިއެވެ.
މިބިލު ފާސްކުރައްވާފައިވަނީ 47 މެންބަރުންގެ އަޣްލަބިއްޔަތުންނެވެ. ފާސްކުރައްވަން ފެނިވަޑައިނުގަންނަވާކަމަށް 2 މެންބަރުން ވޯޓް ދެއްވާފައިވާއިރު 4 މެންބަރަކު ވަކިފަރާތަކަށް ވޯޓް ދެއްވާފައެއް ނުވެއެވެ.
މިބިލުގެ ރިޕޯޓް މަޖިލީހަށް ހުށަހަޅުއްވައިދެއްވީ ޤައުމީ ތަރައްޤީގެ ކޮމިޓީގެ މުޤައްރިރު ޙަމްދޫން ޢަބްދުﷲ ޙަމީދު އެވެ. އަދި 2 މެންބަރުން ބަހުސްކުރައްވާފައިވެއެވެ.
މިއަދުގެ ޖަލްސާގެ ރިޔާސަތު ރައްޔިތުންގެ މަޖިލީހުގެ ރައީސް އަލްފާޟިލް ޢަބްދުﷲ ޝާހިދު އަދި ނައިބު ރައީސް އަޙްމަދު ނާޒިމް ބަލަހައްޓަވާފައިވެއެވެ.
21 އޭޕްރީލް 2014