އަޅުގަނޑުމެންނަށް ގެއްލިގެން ދިޔައީ ވަރަށް ބޮޑު ޖަވާހިރެއް – މެންބަރު ޢަބްދުﷲ ޖާބިރު

“މިއަދަކީ އަޅުގަނޑުމެނަށް ހިތާމަވެރި ދުވަހެއް،” ކާށިދޫ ދާއިރާގެ މެންބަރު ވިދާޅުވިއެވެ. “އަޅުގަނޑުމެން ހަނދާންކުރަން އެބަޖެހޭ. ކަންކަން ވީމާ، އޭގެން އަޅުގަނޑުމެން ޢިބުރަތް ލިބެން އެބަޖެހޭ. ކޮންމެ ފަހަރަކު އަޅުގަނޑުމެންގެ ތެރެއިން ފުލުހަކު މަރުވެފައި، ރައްޔިތުންގެ މަޖިލީހުގެ ޢިއްޒަތްތެރި މެންބަރަކު އަވަހާރަކޮށްލާފައި، ދެންހުރި މީހަކު މަރުވީމާ އަޅުގަނޑުމެން މިތާނގައި ސައްލާކޮށްފައި އެ ހަދާންތައް، ޛިކުރާ އާކުރަމުންދާ ދިޔުމެއްގެ ގޮތުގައި ނިމިގެންނުވާނެ. އަޅުގަނޑުމެންގެ މި ކުޑަކުޑަ މާލޭގެ ސެކިއުރިޓީ ބެލެހެއްޓެންވާނެ.”

ކާށިދޫ ދާއިރާގެ މެންބަރު ވިދާޅުވީ މި ޢަމަލު ކުށްވެރިކުރާކަމަށާއި އަފްރާޝީމު ޢަލީ އަވަހާރަކޮށްލި ކޮށްލުމަކީ އެކަކު ވެސް ގަބޫލުކުރާނެ ކަމެއް ނޫންކަމަށެވެ. އަދި ދިވެހިރާއްޖޭގެ އެއްވެސް ރައްޔިތަކު އެގޮތަށް އަވަހާރަކޮށްލުމަކީ، އެދޭނެ ކަމެއް ނޫންކަމަށްވެސް ކާށިދޫ ދާއިރާގެ މެންބަރު ވިދާޅުވިއެވެ.

“އެއްވެސް ރައްޔިތަކު އެދޭނެ ކަމެއް ނޫން. ޖުމްހޫރީ ޕާޓީގެ ޕާލިމެންޓްރީ ގްރޫޕުން މިކަން ވަރަށް ހަރުކަށި އިބާރާތުން އަޅުގަނޑުމެން ކުށްވެރިކުރަން،” ކާށިދޫ ދާއިރާގެ މެންބަރު ވިދާޅުވިއެވެ. “އަޚް، އަފްރާޝީމު ޢަލީ އަކީ ގައިމު މީހަކު ހަސަދަވެރިވެގެން، އެ ބޭފުޅާގެ ފަރާތުން އަނިޔާ އެއް ލިބިގެން، އެ ބޭފުޅާ ކުށެއް ކޮށްގެން، އެ ބޭފުޅާ މީހަކާ ޢަދާވާތްތެރިވެގެން، އެ ބޭފުޅާ މީހަކު މަރާލަންޖެހޭ، އެވަރު ކަމެއް ކުރާނެ ބޭފުޅެއް ނޫން ހަމަ އެއްގޮތަކަށްވެސް.”