މިއަދު އޮތް ރައްޔިތުންގެ މަޖިލީހުގެ މިދައުރުގެ 10 ވަނަ ޖަލްސާގައި، ހިތަދޫ ދެކުނު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، ޤާނޫނު ނަންބަރު 5/2007 (ދިވެހި ސިވިލް ސަރވިސްގެ ޤާނޫނު) އަށް އިޞްލާޙު ގެނައުމުގެ ބިލުގެ ބަހުސް ކުރިއަށްގެންދަވާފައިވެއެވެ. ބަޙުސަށް ކަނޑައަޅުއްވާފައިވާ ގަޑި ހަމަވިއިރު، މި ބިލަށް މިއަދު 10 މެންބަރުން ވާހަކަ ދައްކަވާފައިވެއެވެ.
އެއަށްފަހު މިއަދުގެ ޖަލްސާގައި ކުރިއަށް ގެންދެވީ، ވިޔަފާރި ރަޖިސްޓްރީކުރުމުގެ ބިލު، ކޮމިޓީ މަރުޙަލާ ނިމި މަޖިލީހުން ރިޢާޔަތްކުރެއްވުމުގެ މަސައްކަތެވެ. އަދި ރައްޔިތުންގެ މަޖިލީހުގެ ގަވާއިދަށް ކުޑަހުވަދޫ ދާއިރާގެ މެންބަރު އަޙްމަދު ޢާމިރު ހުށަހަޅުއްވާފައިވާ އިޞްލާޙު ދިރާސާކުރެއްވުމަށްފަހު ޢާންމު ކޮމިޓީން ނިންމެވިގޮތުގެ ރިޕޯޓް ހުށަހަޅުއްވާ، އެ ބިލުގެ މައްޗައް ބަޙުސް ފައްޓަވާފައިވެއެވެ. މިއަދުގެ ޖަލްސާގެ ވަގުތު ހަމަވިއިރު 6 މެންބަރުން ވަނީ ބަޙުސް ކުރައްވާފައެވެ.