މާލިއްޔަތު ކޮމިޓީގެ މިއަހަރުގެ 14 ވަނަ ބައްދަލުވުން މިއަދު ހެނދުނު 9:40 ން 10:40 އަށް ބާއްވައިފިއެވެ. މި ބައްދަލުވުމުގައި 7 މެންބަރުން ބައިވެރިވެވަޑައިގެންފައިވެއެވެ.
މިއަދުގެ ބައްދަލުވުމުގައި ކުރިއަށްގެންދަވާފައިވަނީ އިލެކްޝަންސް ކޮމިޝަންގެ 2010 ވަނަ އަހަރުގެ އޮޑިޓް ރިޕޯޓު ބެއްލެވުމުގެ މަސައްކަތެވެ. މި ރިޕޯޓާއި ގުޅޭގޮތުން ހުށަހަޅުއްވާފައިވާ ހުށަހެޅުންތަކާއި ބެހޭ ގޮތުން މަޝަވަރާ ކުރައްވާފައިވާ ނަމަވެސް، މިއަދުގެ ބައްދަލުވުން ނިމިގެން ދިޔައީވެސް މި ރިޕޯޓާއި މެދު ވަކި ގޮތަކަށް ނިންމުމެއް ނުނިންމައެވެ.
މިއަދުގެ މާލިއްޔަތު ކޮމިޓީގެ ބައްދަލުވުން ކުރިއަށްދާ ގޮތް ބެއްލެވުމަށް ވާރލްޑް ބޭންކް ގްރޫޕްގެ ސީނިއަރ ފައިނޭންޝަލް މެނޭޖްމެންޓް ސްޕްޝަލިސްޓެއް ކަމަށްވާ މިސްޓަރ. ލެސްލީ ކޮޗީމާ ވަނީ ކޮމިޓީއަށް ހާޒިރުވެފައެވެ.
މިއަދުގެ މާލިއްޔަތު ކޮމިޓީގެ ބައްދަލުވުމުގައި ބައިވެރިވެވަޑައިގެންފައިވާ މެންބަރުންނަކީ ކޮމިޓީގެ މުޤައްރިރު ދިއްގަރު ދާއިރާގެ މެންބަރު އަޙްމަދު ނާޒިމް، އަލިފުށި ދާއިރާގެ މެންބަރު މުޙަންމަދު ނާޝިޒް، ކުޅުދުއްފުށީ އުތުރު ދާއިރާގެ މެންބަރު ޢަބްދުލް ޣަފޫރު މޫސާ، ވިލުފުށި ދާއިރާގެ މެންބަރު ރިޔާޒް ރަޝީދު، ވައިކަރަދޫ ދާއިރާގެ މެންބަރު ޢަލީ ޢާރިފް، ނޮޅިވަރަމު ދާއިރާގެ މެންބަރު މުޙައްމަދު ނަޝީދު އަދި މާފަންނު ހުޅަނގު ދާއިރާގެ މެންބަރު ޢަބްދުﷲ ޢަބްދުއްރަޙީމް އެވެ.