ފަލަސްތީނުގެ ރައީސް މަޙްމޫދް އައްބާސް އާ މަޖިލީހުގެ ރައީސް ބައްދަލުކުރައްވައިފި

މިހާރު ރާއްޖެ ވަޑައިގެން އުޅުއްވާ ފަލަސްޠީނިއަން ނޭޝަނަލް އޮތޯރިޓީގެ ރައީސް ހިޒް އެކްސެލެންސީ މިސްޓަރ. މަޙްމޫދް އައްބާސް އާއި ރައްޔިތުންގެ މަޖިލީހުގެ ރައީސް އަލްފާޞިލް އަބްދުﷲ ޝާހިދު މިއަދު ހަވީރު 18:30 ގައި ބައްދަލުކުރައްވައިފިއެވެ.

މި ބައްދަލުވުމުގައި ވާހަކަދައްކަވަމުން މަޖިލީހުގެ ރައީސް އަލްފާޞިލް އަބްދުﷲ ޝާހިދު ވަނީ، ފަލަސްޠީނާއި ރާއްޖެއާއި ދެމެދު ޒަމާނުއްސުރެ އޮންނަ ގާތް ގުޅުން ފާހަގަކުރައްވާފައިވެއެވެ. އަދި ފަލަސްޠީނަށް ކުރިމަތިވެފައިވާ ހަނގުރާމައާއި މެދު ރާއްޖެއިން ކަންބޮޑުވާ ކަމަށާ، ފަލަސްޠީނަށް ރާއްޖޭގެ ފުރިހަމަ އެއްބާރުލުން އޮންނަ ކަމަށް ވިދާޅުވެފައިވެއެވެ. އަދި މީގެ ކުރިން ރާއްޖެ ޒިޔާރަތް ކުރައްވާފައިވާ އެ ޤައުމުގެ ރައީސް ޔާސިރު އަރަފާތުގެ ދަތުރުފުޅުގެ ހަދާން އަދިވެސް ދިވެހީން އާކުރަމުންދާ ކަމަށް ވިދާޅުވެފައިވެއެވެ.

މީގެ އިތުރުން ރާއްޖޭގައި ޑިމޮކްރެޓިކް ނިޒާމެއް ޤާއިމް ކުރެއްވުމަށް ސަރުކާރުން ކުރައްވަމުން ގެންދަވާ މަސައްކަތްތައް ފާހަގަކުރައްވާ، ފާއިތުވެ ދިޔަ ތިން އަހަރު ރާއްޖެއަށް ވަރަށް ގިނަ ކަންތައްތައް ހާސިލް ކުރެވިފައިވާ ކަމަށް އަލްފާޞިލް އަބްދުﷲ ޝާހިދު ވިދާޅުވިއެވެ. އަދި ދިވެހީން ތިބީ، ފުރިހަމަ ޑިމޮކްރަސީގެ ނިޒާމެއް ރާއްޖެއަށް ގެނައުމަށް އުންމީދުކޮށްގެން ކަމަށް ވިދާޅުވިއެވެ.

މި ބައްދަލުވުމުގައި ފަލަސްޠީނުގެ ރައީސް ހިޒް އެކްސެލެންސީ މިސްޓަރ. މަޙްމޫދް އައްބާސް ދެއްކެވި ވާހަކަފުޅުގައި، ރާއްޖެއަށް ޒިޔާރަތް ކުރެއްވުމުގެ ފުރުޞަތު ލިބުމުން އެކަމާ މެދު އުފާފާޅުކުރައްވާ، އަދި އެމަނިކުފާނަށް ލިބިގެންދިޔަ ހޫނު މަރުޙަބާއަށްޓަކައި ޝުކުރު އަދާކުރައްވާފައިވެއެވެ.

އަދި ފަލަސްޠީނުގެ ރައްޔިތުންގެ ހައްޤުތައް ހޯދުމަށް އެ ޤައުމުން ކުރަމުން ގެންދާ މަސައްކަތަށް ރާއްޖެއިން އެއްބާރުލުން ދޭތީ، އެކަމަށްޓަކައި އެ މަނިކުފާނު ވަނީ ޝުކުރު ދަންނަވާފައެވެ. ފަލަސްޠީނަށް ކުރިމަތިވެފައިވާ މައްސަލައަށް ސުލްޙަވެރި ހައްލެއް ގެނައުމަށް އަދިވެސް ގިނަގުނަ މަސައްކަތްތައް ކުރެވެމުންދާ ކަމަށް އެ މަނިކުފާނު ވިދާޅުވިއެވެ. އެގޮތުން ޤުދުސްއަކީ ފަލަސްޠީނުގެ ވެރިރަށް ކަމުގައި ދުނިޔޭގެ 132 ޤައުމުން ބަލައިގަންނާތީ، އެއީ ފަލަސްޠީނަށް ލިބުނު އިތުރު ހިތްވަރެއް ކަމަށާ، ކައިރި މުސްތަޤްބަލެއްގައި އިސްރާއީލާއެކު ދެކެވެމުންދާ ސުލްޙައިގެ މަޝްވަރާތަކަށް އެދެވޭ ކުރިއެރުމެއް ލިބިގެންދާނެ ކަމުގެ އުންމީދު އެބަ އޮތް ކަމަށް އެ މަނިކުފާނު ވިދާޅުވިއެވެ.

ބައްދަލުވުން ނިންމަވާލައްވަމުން މަޖިލީހުގެ ރައިސްވަނީ، އެމަނިކުފާނާއި، ރައްޔިތުންގެ މަޖިލީހުގެ މެންބަރުންގެ ފަރާތުން ހިޒް އެކްސެލެންސީ މިސްޓަރ. މަޙްމޫދް އައްބާހަށް ތަޙުނިޔާ ދަންނަވާފައެވެ. އަދި މަޖިލީހުގެ ރައީސަށާއި، ރައްޔިތުންގެ މަޖިލީހުގެ މެންބަރުންނަށް ފަލަސްޠީނުގެ ރައީސްވަނީ ތަހުނިޔާ ދަންނަވާ، ދެން ފަހަރަކުން އެ ބޭފުޅުންނާއިވެސް ބައްދަލުކުރެއްވުމުގެ ފުރުޞަތު ލިބޭނޭ ކަމަށް އުންމީދު ކުރައްވާ ކަމަށް ވިދާޅުވެފައެވެ.