ޕްރީ ސްކޫލް ހިންގުމުގެ ބިލު ޤައުމީ ތަރައްޤީގެ ކޮމިޓީން ދިރާސާކުރައްވައި ނިންމެވިގޮތުގެ ރިޕޯޓަށް މިއަދު ބޭއްވުނު ރައްޔިތުންގެ މަޖިލީހުގެ 2011 ވަނަ އަހަރުގެ 3 ވަނަ ދައުރުގެ 24 ވަނަ ޖަލްސާގައި ބަހުސްކުރައްވައިފިއެވެ.
މިގޮތުން މިބިލަށް 15 މެންބަރުން މިއަދުގެ ޖަލްސާގައި ވާހަކަ ދައްކަވާފައިވެއެވެ. ޕްރީ ސްކޫލް ހިންގުމުގެ ބިލު މަޖިލީހަށް ހުށަހެޅުއްވީ 6 އޮކްޓޯބަރ 2009 ގައި އޮތް ރައްޔިތުންގެ މަޖިލީހުގެ 45 ވަނަ ޖަލްސާގައެވެ. އެބިލާމެދު މަޖިލީހުގައި ބަހުސްކުރެއްވުމަށްފަހު، މެންބަރުން ފާޅުކުރެއްވި ޚިޔާލުތަކުގެ އަލީގައި އެބިލު އިޞްލާޙުކުރެއްވުމަށްޓަކައި ޤައުމީ ތަރައްޤީގެ ކޮމިޓީއަށް ފޮނުއްވުމަށް ނިންމެވީ 9 މާރޗް 2010 ގައި އޮތް ރައްޔިތުންގެ މަޖިލީހުގެ 2010 ވަނަ އަހަރުގެ ފުރަތަމަ ދައުރުގެ 5 ވަނަ ޖަލްސާގައެވެ. ބިލުގެ މަސައްކަތް ނިންމެވީ 25 އޮކްޓޯބަރ 2010 ގައި ބޭއްވެވި އެކޮމިޓީގެ 5 ވަނަ ބައްދަލުވުމުގައެވެ. މިބިލަކީ ޖުމްލަ 31 މާއްދާއެއްގެ މައްޗަށް އެކުލެވިގެންވާ ބިލެކެވެ.
19 މުހައްރަމް 1433
14 ޑިސެމްބަރ 2011