މިއަދު އޮތް ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ 12 ވަނަ ޖަލްސާގައި، ސަރުކާރުގެ ފަރާތުން މާވަށު ދާއިރާގެ އިއްޒަތްތެރި މެންބަރު އަޙްމަދު އަޒްހާން ފަހުމީއަށް ހުށަހަޅުއްވާފައިވާ، ކަނޑުގައި ދުއްވާ އުޅަނދުތައް ދުއްވުމާބެހޭ ޤާނޫނު (ޤާނޫނު ނަންބަރު: 69/78) އަށް އިޞްލާޙު ގެނައުމުގެ ބިލު މަޖިލީހުން ބަލައިގަތުމަށް، 53 މެންބަރުންގެ އަޢުލަބިއްޔަތުން ފާސްކުރައްވައި، އިޖްތިމާޢީ ކޮމިޓީއަށް ފޮނުއްވައިފިއެވެ.
މިއަދުގެ ޖަލްސާގައި، މިބިލު ބަލައިގަތުމަށް ފެނިވަޑައިނުގަންނަވާކަމަށް 10 މެންބަރުން ވޯޓު ދެއްވިއެވެ. އަދި ވަކިފަރާތަކަށް ވޯޓު ދެއްވަންބޭނުންފުޅުނުވާ ކަމަށް 2 މެންބަރުން ވޯޓްދެއްވިއެވެ.
މިބިލުގެ ފުރަތަމަ ކިޔުން އިއްވާފައިވަނީ 16 ނޮވެމްބަރ 2016 ވަނަ ދުވަހު ބޭއްވުނު މިއަހަރުގެ ތިންވަނަ ދައުރުގެ 09 ވަނަ ޖަލްސާގައެވެ.