ބްރޯޑްކާސްޓްކުރުމުގެ ބިލަށް މަޖިލީހުން ގެންނެވި އިސްލާޙުތަކާއިއެކު ފާސްކުރައްވައިފި(3.8.2010)

މިއަދު ބޭއްވުނު ރައްޔިތުންގެ މަޖިލީހުގެ 2010 ވަނަ އަހަރުގެ ދެވަނަ ދައުރުގެ 24 ވަނަ ޖަލްސާ އިޤްތިޞާދީ ކޮމިޓީން ދިރާސާ ކުރައްވާ ނިންމެވި ބްރޯޑްކާސްޓްކުރުމުގެ ބިލަށް މަޖިލީހުން ގެންނެވި އިޞްލާޙާއެކު ފާސްކުރައްވައިފިއެވެ.

މިއަދުގެ ޖަލްސާގައި މައްޗަންގޮޅި ދެކުނު ދާއިރާގެ މެންބަރު މުޙަންމަދު ރަޝީދު ހުށަހަޅުއްވާފައިވާ، ގަސްގަހާގެހި ކަރަންޓީނުކުރުމާބެހޭ ބިލުގެ އިބްތިދާއީ ބަހުސްނިންމުމަށްފަހު މަޖިލީހުން ބިލު ބަލައިގަތުމަށް ވޯޓަށް އެހުމުން އެވަގުތު މަޖިލީހަށް ހާޒިރުވެ ތިއްބެވި 73 މެންބަރުންގެ ތެރެއިން 71 މެންބަރުންގެ އިއްތިފާގުން ފާސްކުރައްވާ މަޖިލީހުގެ ގަވާއިދުގައިވާ ގޮތުގެ މަތިން އިގްތިސާދީ  ކޮމެޓީއަށް އެބިލުވަނީ ފޮނުއްވާފައެވެ.

މިއަދުގެ ޖަލްސާގައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 129 ވަނަ މާއްދާގެ (ހ) ގެ ދަށުން ވަޒީރުންގެ މަޖިލީހުގެ މެންބަރުންގެ ގޮތުގައި 7 ޖުލައި 2010 ވީ ބުދަ ދުވަހު ރައީސުލްޖުމްހޫރިއްޔާ އަޢްޔަނުކުރައްވާފައިވާ ބޭފުޅުންގެ ނަންފުޅުތައް، މަޖިލީހަށް އިއްވުމަށްފަހު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 129 ވަނަ މާއްދާގެ (ރ) ގައިވާ ގޮތުގެމަތިން ރައްޔިތުންގެ މަޖިލީހުގެ ރުހުން ހޯދުމަށްޓަކައި އެމައްސަލަ ރައްޔިތުންގެ މަޖިލީހުގެ ގަވާއިދުގެ 171 ވަނަ މާއްދާގެ (ށ) ގެ ދަށުން ސަރުކާރުގެ މަސްޢޫލިއްޔަތު އަދާކުރާ މިންވަރު ބަލާ ކޮމެޓީއަށް މިމައްސަލަވަނީ ފޮނުއްވާފައެވެ.

އެއަށްފަހު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 147 ވަނަ މާއްދާގައި ބަޔާންކޮށްފައިވާ ގޮތުގެމަތިން އުއްތަމަފަނޑިޔާރު ޢައްޔަނުކުރުމަށްޓަކައި، ޖުޑީޝަލް ސަރވިސް ކޮމިޝަނުގެ މަޝްވަރާގެ މަތިން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅުއްވާފައިވާ ހދ. ވައިކަރަދޫ / ވައިޖެހޭގެ، އަލްއުސްތާޛު އަޙްމަދު ފާއިޒް ޙުސައިންގެ ނަންފުޅު، ރައްޔިތުންގެ މަޖިލީހުގެ ގަވާއިދުގެ 171 ވަނަ މާއްދާގެ (ށ) ގެ ދަށުން މަޖިލީހުގައި އިޢުލާންކުރައްވައި، މި މައްސަލަ ދިރާސާކުރައްވައި ގޮތެއް ނިންމެވުމަށް މިނިވަން މުއައްސަސާތަކުގެ ކަންތައްތަކާބެހޭ ކޮމިޓީއަށް ވަނީ ފޮނުއްވާފައެވެ.

މީގެއިތުރުން މިއަދުގެ ޖަލްސާގައި ވައިގެމަގުން ދަތުރުކުރާ ފަސިންޖަރުންގެ ޙައްޤުތައް ރައްކާތެރިކުރުމުގެ ބިލު ސަރުކާރުގެ ފަރާތުން މިއަދުގެ ޖަލްސާއަށް ވަނީ ހުށަހަޅުއްވާފައެވެ. މިބިލު މަޖިލީހަށް ހުށަހަޅުއްވައިދެއްވީ ތިނަދޫ ދާއިރާގެ މެންބަރު މުޙަންމަދު ޤަސަމްއެވެ. މިބިލުގެ އިބްތިދާއީ ބަހުސް ކުރިއަށް ގެންދަވަނިކޮށް މިއަދުގެ ޖަލްސާގެ ވަގުތު ހަމަވުމުން ރިޔާސަތުން ވަނީ ޖަލްސާ ނިންމަވާލައްވާފައެވެ.

71 މެންބަރުން ހާޒިރުވެވަޑައިގެންނެވި މިއަދުގެ ޖަލްސާގެ ރިޔާސަތު ބެލެހެއްޓެވީ، ރައްޔިތުންގެ މަޖިލީހުގެ ރައީސް އަލްފާޟިލް ޢަބްދުﷲ ޝާހިދާއި، ރައްޔިތުންގެ މަޖިލީހުގެ ނާއިބު ރައީސް އަލްފާޞިލް އަޙުމަދު ނާޒިމާއި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 82 ވަނަ މާއްދާގެ (ށ) އާ ހަވާލާދީ ރައްޔިތުންގެ މަޖިލީހުގެ ގަވާއިދުގެ 10 ވަނަ މާއްދާގެ (ހ) ގައިވާ ގޮތުގެމަތިން ވެލިދޫ ދާއިރާގެ މެންބަރު ޢަލީ މުޙަންމަދުއެވެ.

މަޖިލީހުގެ ޖަލްސާއެއް ދެން އޮންނާނީ 4 އޯގަސްޓް 2010 ވާ ބުދަދުވަހު ހެނދުނު 9 ޖަހާއިރުއެވެ.